Wednesday, May 24, 2017

UJUMBE WA WIKI HII: MAISHA HAYAMTAMBULISHI MTU KWA WATU....

Maisha hayamtambulishi mtu kwa watu atakaokukutana nao. Kuna wakati, maisha yaweza kukukutanisha na watu ambao uliwahitaji/unawahitaji kukutana nao ili wakupe msaada, ili wakuumize, ili wakuongoze, ili wakuache mpweke, ili wakupende na ili wakupe/wakutie nguvu katika hatua ya  kukuimarisha ili uwe mtu imara katika maisha yako.....TUPO PAMOJA!

Tuesday, May 23, 2017

MBOGA NA MATUNDA NI MUHIMU KWA KILA BINADAMU

Lakini pia inasemekena tuwe makini , yaani kila kitu kiwe wastani tusizidishe. Maana utakuta mtu anaacha kula vyakula vingine na akawa anakula matunda tu...kumbuka katika matunda kuna sukari sana. NI UJUMBE WANGU KWENU...Kapulya wenu.

Sunday, May 21, 2017

JUMAPILI NJEMA...

 Vazi la Jumapili ya leo....nimekumbuka mtindo wa kufunga mkanda zilipendwa mmeona eeeh!
Kama kawaida mbwembwe  tu hapa nilikuwa sijui nikiomba?

Friday, May 19, 2017

NIMETUMIWA ZAWADI YA DAGAA NYASA

Ukiwa na hamu ya vyakula vya nyumbani na marafiki wanakutumia ni raha sana. Leo nimebahatika kutumiwa dagaa nyasa  na rafiki yangu mpendwa ....angalao nile kwa macho:-(. IJUMAA NJEMA KWA WOTE.

Thursday, May 18, 2017

MAMA HIVI ULIMPA MUNGU SHILINGI NGAPI?


Baada ya miaka saba ya ndoa bila kupata mtoto, Magreth alimuambia mumewe Benjamin kuwa atafute mwanamke mwingine wa kuzaa naye. Walishahangaika sana kuzunguka mahospitalini na kwa waganga wa kienyeji bila mafanikio.

Nyumba yao ilikua na amani na Ben alishakubaliana na ile hali, lakini ndugu zake walikua wanasumbua sana, walimtukana mkewe matusi mengi, wakimuambia kula, kulala anawajazia choo, walimnyanyasa sana na Mage hakuwa na raha.

Aliona njia pekee ni kumruhusu mumewe kuoa mwanamke mwingine ili angalau apate mtoto na ndugu zake waache kumsakama. Ben hakuwa tayari kuoa mwanamke mwingine, alikataa katakata lakini mkewe alisisitiza huku akitishia kuondoka kama asingeoa mke mwingine.

Siku moja Ben aliamua kuwaita ndugu zake wote, na wote waliitikaa wito  aliwaambia ana kitu kikubwa cha kuwaambia kwani na yeye alishachoka suala la mtoto na alitaka kufanya mamauzi makubwa. Wakiwa na shauku ya kujua ni nini walifika.

Ben aliwapokea vizuri na baada ya chakula Ben alimuambia mkewe akachukue begi liko kitandani. Ndugu zake walitabasmu wakijua mtoto wao kaamka na sasa anamfukuza mkewe ili atafute mke mwingine na kupata mtoto.

Mkewe alienda kitandani, alichukua begi kubwa na kulileta pale. Ndugu walikaa kimya, Ben alilichukua na kulifungua, lilikua limejaa pesa tu, noti za shilingi elfu kumi  zimepangwa vizuri.

Kila mtu alishangaa na hata mkewe alishangaa. Ben alianza kuongea. “Ndugu zangu nimewaita hapa kwa kuwa  nina tatizo kubwa nyie wote mna watoto Mungu kawabariki hata wewe mdogo wangu hapa ni mjamzito na Mungu akijaalia utajifungua salama.

Lakini mimi na mke wangu Mungu hajatubariki kuwa na  watoto” Alitulia kidogo huku akifuta machozi, yaliyotaka kudondoka. “Sasa nimewaita hapa mnisaidie kitu kimoja tu. Nianze na wewe Mama kwani kila siku umekua ukiniambia kuhusu mjukuu.

Aliongea huku akimgeukia Mma yake. “Chochote mwanangu…” Mama yake aliitikia kwa shauku. “Ninachotaka Mama ni kwamba uniambie ulimpa Mungu shilingi ngapi mpaka akakupa watoto…

Maana mimi nimejaribu imeshindikana, hizi ni hela zote nilizonazo benki na  kesho nitaongea na Dalali ili tuuze nyumba mimi na mke wangu tukapangishe lakini tupate mtoto.”

Alitulia kidogo, watu wote walimshangaa, lakini aliendelea. “Ndugu zangu nisaidieni, nyie mna watoto mlimpa Mungu shilingi ngapi au nini mlitoa, mlimuona wapi mkampelekea, mimi nipo tayari kutoa kila kitu katika maisha yangu ili tu na mimi niitwe Baba na mke wangu aitwe Mama.

Niambieni tu ni bei gani Mungu anapokea?” Wote walinyamaza kimya, hakuna aliyeongea tena, walimuangalia huku wakiangaliana kwa aibu. Hakuna aliyejaribu kunyanyua mdomo.

“Sasa ndugu zangu kama hamjui kiasi ambacho Mungu anapokea ili kutoa watoto basi sitaki kusikia tena hili suala. Mimi na mke wangu tuna furaha, sitaki mtuingilie, siku mkitaja mtoto mje mniambie anauzwa wapi na bei gani nitanunua!

Kama nyie mlinunua au ni wajanja sana mpaka mkampata nifundisheni huo ujanja….Mama…” Alimgeukia Mama yake. “Nakupenda sana lakini mimi sina uwezo wa kujipa mtoto, kama unajua Mungu anataka kiasi gani basi niambie ila kama na wewe hujui basi sitaki umsumbue mke wangu.

Kila siku mnampigia kelele kuwa hazai hazai hivi mnafikiri yeye hataki mtoto, mnafikiri yeye hataki kuitwa Mama, sasa mimi nimemaliza, hizi pesa narudisha ndani siku mkisikia Mungu anauza watoto basi niambieni nitakuja kununua la sivyo mtuache na ndoa yetu..”

Alimaliza kuongea, wote walitoka kimyakimya bila kuongea chochote. Tangu siku hiyo hakukuwa na maneno tena ya mtoto wala nini. Ben na mkewe bado hawajajaaliwa kupata mtoto, wameamua kuasili mtoto yatima na wanaishi naye kama mtoto wao na wote wanafuraha.

***** Imeandikwa Na. Iddi Makengo

Kabla hujamnyanyasa mtu kwa kitu ambacho hana uwezo nacho hembu jiulize wewe ulimpa nini Mungu mpaka akakupa hicho kitu?

 Kwani kuna watu ambao wanadhani kuwa Mungu anawapenda wao zaidi na wao ni bora kuliko wengine.

Monday, May 15, 2017

WANAUME NAO HUNYANYASIKA KIJINSIA MAKAZINI TOFAUTI NA INAVYODHANIWA !

Kama uki google kwa picha ‘Unyanyasaji wa kijinsia makazini’ utashangaa, kwani takribani asilimia 90 ya mapicha picha utakayoyaona yanawaonyesha wanawake wakifanyiwa unyanyasaji wa kijinsia na wanaume.

Lakini ukweli ambao hausemwi ni kwamba wanawake ni wachokozi zaidi ya mara 9 kwa vitendo vya unyanyasaji wa kijinsia katika maeneo ya kazi. Najua kuna baadhi ya wanawake wanaweza kutokwa na povu lakini huo ndiyo ukweli wenyewe.

Kwa kawaida unyanyasaji wa kijinsia ni kitendo cha kumchokonoa mtu wa jinsia tofauti au hata jinsia moja kwa kumfanyia vitendo au ishara za kimapenzi kwa nia ya kumtega, kumshawishi au kumlazimisha kufanya naye mapenzi.

Na hii inaweza kufanywa na mtu mwenye madaraka mahali pa kazi dhidi ya walio chini yake au kati ya wafanyakazi wenyewe kwa wenyewe. Na tatizo hili dhidi ya wanaume limekuwa likikua siku hadi siku katika maeneo ya kazi hapa nchini ni vile tu halisemwi kama linavyosemwa pale muathirika anapokuwa ni wa jinsia ya kike.

Wanawake wamekuwa wakijificha kwenye kichaka cha kujiona kama vile wao ndiyo waathirika wakubwa wa vitendo vya unyanyasaji wa kijinsia mahali pa kazi wakati wanaume kwa upande wao wamekuwa wakifanyiwa vitendo vya namna hiyo lakini wamebaki wakiumia ndani kwa ndani kwa sababu hawana pa kusemea.

Ni nani asiyejua kwamba wanawake licha ya kuvaa mavazi yenye kuacha sehemu ya miili yao ya faragha wazi lakini pia mikao yao isiyo ya staha inawaweka baadhi ya wanaume katika wakati mgumu na kushindwa kufanya kazi. Hilo linaweza likaonekana si tatizo, lakini je vipi kuhusu mazungumzo yenye kushawishi ngono yanayofanywa na wananawake au vitendo vya kuwashika wanaume sehemu zao za siri ili kupima maumbile yao, vitendo vya aina hii viitweje kama siyo unyanyasaji wa kijinsia. Je vitendo vya kuwatomasa tomasa wanaume kunakofanywa na baadhi ya wanawake pale wanapoelekezwa kazi au kufundishwa kazi fulani huo siyo unyanyasaji wa kijinsia?

Kuna baadhi ya mabosi wanawake wamekuwa wakiwataka kimapenzi wanaume walio chini yao kwa nguvu na kama wakikataa watakiona cha mtema kuni. Wapo baadhi ya vijana wa kiume wamegeuka kuwa watumwa wa ngono wa mabosi wao na hawathubutu kufanya fyoko maana hatma ya kazi yao imo mikononi mwa hao mabosi wanawake.

Kuna haja sasa ya wanaume kusema sasa basi imetosha na sisi tutafute jukwaa la kusemea madhila yetu maana wenzetu wamejiweka kwenye kundi la waathirika wa vitendo hivyo kumbe na wao wamegeuka Chui ndani ya ngozi ya kondoo.

Kwa hisani ya Mtambuzi
JF

Friday, May 12, 2017

IJUMAA HII TUKUMBUKE ZILIPENDWA - SINA MAKOSA


IJUMAA NJEMA SANA IWE YENYE FURAHA NA AMANI!

Wednesday, May 10, 2017

KWANINI KHANGA LISIWE VAZI LA TAIFA TANZANIA?


Wakina mama wa Kitanzania wakiwa na vazi la Khanga,kwa mfano kama tukipendekeza vazi la taifa liwe khanga hivi kuna ubaya?

Tuesday, May 9, 2017

BLOGG YA MAISHA NA MAFANIKIO IMEONA HII IWE PICHA YA WIKI...

Nimeiangalia hii picha na kumpongeza huyu mama watoto wanne  na yeye mwenyewe jumla ni watu watano kwa baiskeli moja ....Duh! maisha haya kaaazi kwelikweli...lakini hata  hivyo kilichonifanya niipende picha hii ni nyuso zao wanaonekana wenye furaha na amani pia.....UJUMBE:- UKIWA NA FURAHA PIA AMANI MAISHA HUWA RAHISI KUYAKABILI. KAPULYA WENU.

Sunday, May 7, 2017

HUU NI MSIBA WA TAIFA ULIOTOKEA MEI SITA /POLENI SANA WANAKARATU

KWA PAMOJA WATANZANIA  TUNALIA...KIKUBWA TUWAOMBWA MALAIKA HAWA
PUMZIKENI KWA AMANI  TULIKUWA BADO TUNAWAHITA lakini wote tunapita katika hii dunia . Mmetangulia nasi tutafuta . Pole kwa wazazi/walezi Mwenywzi Mungu awape nguvu kwa kipindi hiki kigumu cha majonzi na maombelezo.

Friday, May 5, 2017

BADO NIPO RUHUWIKO/SONGEA NAKULA VYETU VYA ASILI

ASUBUHI... Karibu chai na maboga
Na baada ya chai na maboga mchana huu karibu tule mahindi ya kuchoma

Wednesday, May 3, 2017

PALE MNGONI ANAPOTAMANI KWAKE RUHUWIKO KULA ALIVYOPANDA

KAZI YA MIKONO YANGU ..NDIZI

Mtoto wa mkulima ni mkulima. Utakula ulichopanda, lakini pia mkulima ni mmoja lakini walaji wengi. leo nimeikumbuka sana migomba yangu  nakula kwa macho tu:-)

Monday, May 1, 2017

TUANZE MWEZI HUU MPYA PIA JUMATATU HII NA HII PICHA

Siku zinakimbia kweli mara hii ni mwezi wa tano...kwa hiyo blog ya Maisha na Mafanikio imeona picha hii iwe mwanzo mzuri wa kuanza wiki pia mwezi.

Sunday, April 30, 2017

NAWATAKIENI JUMAPILI HII YA MWISHO WA MWEZI HUU WA NNE.

Neno la leo; Mathayo 6.
1 Angalieni msifanye wema wenu machoni pa watu, kusudi mtazamwe na wao; kwa maana mkifanya kama hayo, hampati thawabu kwa Baba yenu aliye Mbinguni.
JUMAPILI NJEMA!

Saturday, April 29, 2017

NI JUMAMOSI YA MWISHO YA MWEZI HUU WA NNE :- TUMALIZA KIHIVI....

Nawatakieni jumamosi hii ya ya mwisho wa mwezi huu wa nne iwe njema sana pia ya furaha na amani. PANAPO MAJALIWA .....

Friday, April 28, 2017

NENDA KAMPENDE MKE WAKO

Nimetumiwa na simulizi hii na rafiki binafsi imenigusa sana nikaona niiiweka hapa kama kawaida nisemavyo sipendi kunyimana elimu. KARIBUNI!

Kijana mmoja alikua akimpenda sana Mama yake, kwakua Mama yake almlea kwa shida sana tena kwa upendo wa hali ya juu kijana yule alilipa fadhila kwa kuhakikisha kua Mama yake hakosi kitu chochote.

Baada ya kuoa yeye alihama nyumbani kwao na kwenda kuishi mbali kidogo na Mama yake, lakini katika mji uleule. Pamoja na umbali huo lakini kila siku alienda kumsalimia Mama yake na wadodgo zake.

Alikua akiwapelekea zawadi na fedha za matumizi. Mara nyingi akitoka kazini alikua akitumia muda mwingi nyumbani kwao na wakati mwingine hata chakula cha usiku alikula kule na kurudi nyumbani akiwa maeshiba.

Hali hiyo iliendelea kwa muda na hata walipobarikiwa kupata mtoto bado aliendelea kuwapenda ndugu zake na kutumia muda mwingi wa ziada akiwa nyumbani kwao kuliko nyumbani kwake.

Ingawa hakua akimdharau mkewe wala kumnyanyasa lakini alimpenda Mama yake zaidi. Siku moja jioni akiwa ametoka kazini, alifika nyumbani kwa Mama yake.

Aligonga mlango na kwa bahati nzuri Mama yake alifungua mlango. Lakini wakati akitaka kuingia akiwa na kapu la zawadi mkononi Mama yake alimzuia na kumuambia kuwa hakuna kuingia.

Kijana alishangaa akidhani kua ni utani lakini Mama alikataa katakata na kumuambia. “Mwanangu najua unanipenda sana lakini sasa ni zamu ya mkeo. Wewe ushakua mkubwa umeoa unafamilia yako, nenda kampende mkeo”.

Kijana alishangaa kwani yote aliyokua akiyafanya ni kwakua Mama yake aliteseka kwaajili yake. “Najua unayafanya yote kwa upendo ila mkeo anahitaji upendo pia. Mimi ni Mama yako, ni mtu mzima, lakini yule mkeo, bado ni binti lakini mna mtoto mdogo.

Kama unavyonipenda mimi mama yako nenda kampende Mama wa watoto wako ili aweze kuwalea watoto wenu waje kuwa na upendo kama wewe. Upendo unaonionyesha nikwakua Baba yako alinionyesha upendo wa hali ya juu.

Baba yako alinipenda sana, akanionyesha upendo, moyo wangu ukawa na amani nikawa na kazi ya kuwalea nyinyo kwa furaha. Sasa na nyinyi mna furaha unanihudumia.

Lakini wewe muda mwingi unautumia hapa, mkeo unamuacha peke yake mpweke. Mwanamke akiwa mpweke anakua na kisirani, akishakua na kisirani anakua na hasira na akiwa na hasira basi hutafuta sehemu ya kuzipeleka na anaweza kuzipeleka kwa watoto.

Akizipeleka kwa watoto watalelewa vibaya na hawatakuja kuwa watoto wazuri kama wewe. Nakupenda lakaini sikutaki tena kwangu, nenda kampende mkeo, tengeneza familia yako, hii ni ya kwangu na nishaitengeneza.

Mwanangu unanipenda sana lakini ipo siku nitakufa kama Baba yako, usihuzunike lakini ipo siku hawa wadogo zako wakiume wataoa, hawatakua na muda tena na wewe. Hawa dada zako wataolewa na kuwa na familia zao.

Watakua bize na familia zao kiasi kwamba hamtaonana, hiyo haimaanishi kuwa hawatakua wanakupenda, hapana watakupenda lakini maisha ndiyo yalivyo. Kama ambavyo mimi nilikua na Kaka zangu na Dada zangu.

Kama ambavyo Baba yako alikua na Kaka zake na Dada zake waliokua wakipendana lakini sasa kila mmoja ana familia yake. Wewe utabaki na mkeo na wanao, hao ndiyo watakua familia yako kama ambavyo Baba yako alibaki na mimi na nyinyi.

Sasa kama hukumuonyesha upendo mkeo sasa hivi unafikiri utaishi naye vipi ndugu wakikutelekeza kwasababu ya majukumu yao. Nenda kampende mkeo, mpeleke zawadi.

Kwangu utakuja mara moja moja nikikuhitaji, utakuja ukisikia naumwa na utanitumia matumizi mwisho wa mwezi. Katengeneze familia yako, nenda kanitengenezee wajukuu wazuri, wenye upendo kama ulivyo wewe Baba yao.

Mama alimaliza na kabla kijana hajasema chochote alifunga mlango na kuingia ndani. Kijana alilazimika kurudi nyumbani, alimkuta mkewe kanyongonyea.

Alimkabidhi lile kapu la zawadi na kumuambia zawadi zako hizi. Mke aliruka kwa tabasamu akimshukuru mumewe kwa zawadi ile, kwani muda ulikua umepita bile kupeleka zawadi nyumbani wala kuwahi vile.

****MWANAUME; Wapende ndugu zako lakini jua mwisho wa siku mtu pekee ambaye mtazeeka pamoja ni Mke wako. Kama huamini hembu muangalie Baba yako kule kijijini vipi bado anaishi na shangazi yako?

Lakini hembu muambie Bibi na Babu yako, si wako wawili tu, tena mmewatafutia na mfanyakazi ili awasaidie. Ndiyo huyo mwanamke unayemnyanyasa leo anathamani kuliko huyo Dada yako anayemtukana mkeo kila siku na wewe unachekelea.

Wednesday, April 26, 2017

BAADA YA KUJIFICHA MUDA WA WIKI MOJA HAPA KISIWANI LANZAROTE/USPANIA SASA NIPO NANYI TENA...

Kapulya na mbwembwe zake kama kawaida kamera ilipomnasa
 Baada ya kujinyoosha hapo juu nilinaswa nikiwa nikiangalia mazingira ya hiki kisiwa cha Lanzarote huku Uispania

 Baada ya matembezi ya muda mrefu mtu huwa na njaa na hapa ni chakula kikuu cha Kispania kinaitwa PAELLA...ni chakula kitamu:-)
Sikuishia hapo nilikwenda kwa makumbusho maalufu yaliyopo katika kisiwa hiki cha Lanzarote kuangalia mimia hii ya Cactus....ila sasa nimerudi na nipo nanyi tena kama kawaida....Kapulya wenu

Monday, April 24, 2017

TUANZE JUMATATU HII KWA KUANGALIA BAADHI YA CHANGAMOTO ZA MAISHA YA VIJIJINI

 KUSAIDIANA:- Hakuna baba wala mama..wote mzigo kuchwani, baada ya kazi za shamba kuelekea nyumbani....hii kidogo inaleta furaha.
Mama na mwanae huku mzigo wa kuni kichwani kwa ajili ya kupikia chakula nyumbani.  Hivi ndivyo baadhi ya jamii vjijini yalivyo.

Tuesday, April 18, 2017

NIMEJIFICHA HAPA TANGU JANA...LIKIZO KIDOGO

Hapa ni jana jioni ....mlo wa jioni ....
Na hapa ni leo asubuhi. Tukutane wakati mwingine...Chao.

Sunday, April 16, 2017

AMEFUFUKA MWOKOZO YESU



KHERI YA PASAKA  NDUGU ZANGU WOTE  TUNAOFURAHIA UFUFUKO WAKE MFALME WETU WA AMANI. BARAKA NA FURAHA VITAWALE NDANI YA MIOYO YETU PIA NYUMBA ZETU. PASAKA NJEMA.

Wednesday, April 12, 2017

KUTOKUWA KARIBU NA FAMILIA KUNAVYOATHIRI TABIA ZA WATOTO

MALEZI katika mazingira yetu ya Kiafrika ni suala nyeti. Hatuna historia ya kupuuza watoto tunaowazaa. Kwa kutambua umuhimu wa malezi katika kujenga jamii yenye ustawi, tumekuwa na desturi ya kuelekeza nguvu zetu nyingi katika malezi ya watoto wetu. Kwa mfano, tangu mtoto anapozaliwa, ilikuwa ni lazima alale kitanda kimoja na wazazi wake kwa muda unaozidi miaka miwili. Mtoto mchanga hakuachwa alale kwenye kitanda chake mapema.
Aidha, alikulia mikononi mwa watu wazima aliowafahamu vyema kwa sababu ama aliishi nao kwenye boma la wazazi wake au walitoka miongoni mwa jamii inayomzunguka. Muda mwingi alibebwa mgongoni kwa mama yake au dada zake kuthibitisha kuwa ukuaji wa mtoto ulifuatiliwa kwa karibu mno na wazazi wake.
Jambo hili halieleweki kwa wageni wa bara hili wanaodhani ni aina ya udhalilishaji wa mtoto. Kitendo cha kumbeba mtoto mgongoni  kimethibitika kisayansi kusaidia kujenga muunganiko wa kihisia kati ya mzazi na mtoto.
Wakati wa jioni, familia zilikuwa na desturi ya watoto kukaa na wazazi wao kijinsia. Baba aliota moto na watoto wa kiume akiwasimulia mambo mbalimbali ya kimaisha. Kadhalika, mama naye alifanya kazi za jikoni kwa ushirikiano wa karibu na watoto wa kike. Chakula kilipokuwa tayari kililiwa kwa ushirikiano. Muda wa chakula ulifahamika na kila mtoto aliwajibika kupata chakula. Desturi hii ya kukaa karibu na watoto na kufanya mambo mengi kwa pamoja mbali ya kuwasaidia wazazi kuwafundisha watoto maarifa na ujuzi wa aina mbalimbali, ilikuza uhusiano wa karibu wa kifamilia ambao uliwahakikishia usalama wao. Hali ya mtoto kumwamini na kujisikia salama mikononi mwa mzazi inategemea uwapo endelevu wa mzazi kimwili na kihisia tangu anapozaliwa.
Hata hivyo, kadri mwanadamu anavyozidi ‘kuendelea’ na ‘kustaarabika’, ndivyo desturi hii ya kupatikana kwa wazazi nyumbani inavyozidi kukosa umaarufu. Kwa mfano; ipo dhana inajengeka katika jamii kwamba maendeleo halisi ni vitu. Matokeo ya imani hii ni kutufanya tutumie muda mwingi kujilimbikizia vitu kwa gharama ya uhusiano na ustawi wa familia zetu.
Kadhalika, zipo changamoto nyingine za kijamii zinazotishia desturi hii ya familia. Kuna masuala kama kazi/ajira zinazowatenganisha wazazi na familia, misukosuko ya kimahusiano inayozaa talaka na/ama kulazimisha malezi ya mzazi mmoja, ujio wa shule za bweni kwa watoto wadogo pamoja na matatizo kadha wa kadha yanayofanya watoto wadogo wakue katika mazingira magumu yasiyo na uangalizi mzuri.
Kwa hiyo, tafiti zinazochunguza matokeo/athari za mazingira ya kimalezi katika ukuaji wa mtoto ni jitihada za kutafuta majibu ya changamoto hizi zisizokwepeka. Kwa kifupi, tunaweza kutaja mambo mawili kwa kutumia matokeo ya tafiti hizo. Kwanza, uhusiano wa mzazi na mtoto ndiyo unaoamua uhusiano kati ya mtoto na watu wengine na namna mtoto huyo atakavyojitazama yeye mwenyewe na watu wengine akiwamo mzazi wake.
Suala la pili ni matokeo ya umbali -kimwili na kihisia – unaotokea katika kipindi cha awali kabisa cha maisha yake, unaoweza kujenga hitilafu za kitabia kwa mtoto.
Mwandishi ni mwalimu wa Saikolojia katika Chuo Kikuu cha Kikatoliki Mwenge (MWECAU). 

Tuesday, April 11, 2017

WATOTO UWALEAVYO NDIVYO WAKUAVYO...MICHEZO !

 Michezo hii huwajengea watoto tunu njema kama umakini, furaha, urafiki, ubunifu, kuchemsha bongo na pia kutulia nyumbani na mengine mengi.
Hapa wakicheza mdako...nimekumbuka mbali sana maana nilikuwa nikipenda sana huu mchezo...hapa pia yahitaji umakini maana wakati wote ni kuhesabu tu...Vipi nawe ndugu msomaji una mchezo ambao ulicheza enzi hizo?

Friday, April 7, 2017

PICHA YA WIKI...SIO MCHEZO HARUSI MTINI

Napenda kuwatakieni wote Ijumaa njema sana wote mtakaopita hapa leo pia mwisho wa juma uwe mwema...ni wenu kapulya.

Thursday, April 6, 2017

NGOJA LEO TUANGALIE:- MISINGI SITA YA KUWA NA FURAHA KATIKA MAISHA

TABASAMU 
1. Usimchukie yeyote hata kama atakukosea sana.
2. Ishi maisha ya kawaida hata kama upo juu kimaisha.
3. Tarajia baraka hata kama magumu yanakusonga.
4. Toa hata kama wewe umenyimwa.
5. Onyesha tabasamu hata kama moyo unavuja damu.
6. Usiache kuwaombea wengine hata kama yako hayajajibiwa.

Tuesday, April 4, 2017

LEO NGOJA TUKUMBUKE ZILIPENDWA...TANZANIA YETU NI NCHI YA FURAHA


Leo nimekumbuka zamani nilipokuwa msichana mdogo nilikuwa nikisikia sana hizi nyimbo kwa hiyo leo nimekumbuka .....tuungane tunaozikumbuke hizi nyimbo .

Monday, April 3, 2017

MWEZI HUU WA NNE TUANZE NA PICHA HII...AMA ZAKO AMA ZANGU....


Pale unyanyasaji unapozidi hali inakuwa hivi....ama zako ama zangu ...Duh! kazi kwelikweli. TUACHE unyanyasaji na TUPENDA KWA DHATI.

Friday, March 31, 2017

KUMBUKUMBU...VYAKULA NIVIPENDAVYO..MWISHO WA JUMA PIA MWEZI UWE MWEMA....


 Mboga ya maboga...Karibuni nitaanza bustani yangu hii ni kaka yangu kanitumia ili nitamani zaidi:-) na kweli nimetamani sana na mpaka nimepitiliza na kutamani .....
...ugali na mlenda pori..duh! nimekumbuka mbali sana.... kila la kheri na mwisho wa juma mwema  pia mwishi wa mwezi...  

Wednesday, March 29, 2017

NI JUMATANO YA MWISHO NA HILI NI NENO LA LEO JUMATANO HII YA MWISHO WA MWEZI HUU WA TATU...

KUKUMBWA NA CHANGAMOTO ZA MAISHA NI LAZIMA , LAKINI KUSHINDWA NI HIARI YA MTU.
NAWATAKIENI WOTE MTAKAIPOTA HAPA SIKU NJEMA SANA!...Kapulya.

Tuesday, March 28, 2017

JE? UNGEKUWA WEWE UNGEFANYA NINI?

Pale unapotuma pesa nyumbani kwenu  zaidi ya miaka mitano urekebishiwe nyumba yako. Halafu siku ya kurudi unakuta hali kama hii. Je? hapo unafanyaje?
Ndiyo;- Niliwahi kusimuliwa kisa kama hiki na rafiki mmoja yalimpata kama haya. Uaminifu umepotea siku hizi .

Monday, March 27, 2017

NILIBAHATIKA KUWA KWENYE KOZI YA :- FUNCA- ADMNITRATORS IN HAMMARÖ MUNICIPALITY

Funca-administratörer i Hammarö kommun

22 mars 2017
För att förbättra arbetet inom LSS (lagen om stöd och service) på Hammarö har personal och enhetschefer i kommunen blivit utbildade till Funca-administratörer. Funca är ett arbetsverktyg som ska förebygga och minska utmanande beteenden hos vuxna personer med kognitiv nedsättning inom LSS.
Nimejaribu kutafsiri kwa kiswahili toka hapo juu:- Ili kuboresha kazi ya LSS (Sheria juu ya msaada na huduma) katika Hammarö, wafanyakazi na kitengo katika manispaa wamepata mafunzo kwa Funca watawala. Funca ni chombo cha kuzuia na kupunguza tabia zenye changamoto kwa watu wazima na (wenye shida ya mtindio wa akili) kuharibika kwa utambuzi katika LSS.
Funca arbetar för en bättre livskvalitet och ökad självständighet för personer inom LSS och för en minskning av begränsningsåtgärder. Verktyget kommer hjälpa personal att arbeta förebyggande, jobba mot samma mål, ha ett gemensamt språk och hur en person med svåra symtom ska bemötas med siktet inställt på att minska läkemedelsanvändning.
Hammarö kommuns första administratörer är nu utbildade och fler kommer utbildas till hösten. Det kommer att finnas administratörer på alla LSS-enheter i kommunen.
Tafsiri ya kiswahili:- Funca ni kufanya kazi kwa bora wa maisha na kuongezeka kwa uhuru kwa watu katika LSS, na kwa ajili ya kupunguza hatua ya kiwango cha juu. mfumo huu wa utasaidia wafanyakazi kufanya kazi kwa vitendo, kufanya kazi kwa lengo moja, kuwa na lugha ya kawaida na jinsi mtu aliye na dalili kali wanapaswa kutibiwa kwa lengo la kupunguza matumizi ya madawa.
Hawa ni watendaji wa kwanza kwa Hammarö kwa kupata haya mafunzo na wengine zaidi watapewa mafunzo hapo baadaye. Kutakuwa na watendaji wa vitengo vyote vya LSS katika manispaa hii.

Friday, March 24, 2017

HAYA MWISHO WA JUMA NDIO UNAKARIBIA SASA...NA HIZI ZIWE PICHA ZA WIKI HII........

Huyo dada kafunga mstari makande kwa bia...duh! kaaazi kwelikweli. Haya ndugu zanguni muwe na mwisho mwema wa juma kama  ni kwa mtindo huu kama huyo dada au tu
 kwa mtindo huu  na pengine labda....
...kwa mtindo huu .
na labda pia kwa mtindo wa kuwa na familia mkiwa mmetulia nyumbani  baada ya kazi ya wiki nzima. Kwa mtindo wa kuwa pamoja na kusimuliana hadithi mbalimbali na vipi wiki kwa ujula imekuwaje? HAYA KAPULYA WENU ANAWATAKIENI MWISHO MWEMA WA WIKI. TUPO PAMOJA DAIMA. 

Thursday, March 23, 2017

MAISHA:- WATOTO WANAPOCHEZA NDIO HUJIFUNZA MAISHA

Sisi binadamu hujifunza mambo mengi katika michezo...lakini baadhi ya walezi/wazazi huona watoto wachezapo wanapoteza muda na huwakatisha na kutaka wafanye kazi nyingine... WAZAZI/WALEZI TUWAACHE WATOTO WAWE WATOTO......

Tuesday, March 21, 2017

TASWIRA YA WATU NI KAMA MTI WENYE MAJANI,MATAWI NA MIZIZI PIA

Nikiangalia mti napata taswira ya watu wanaotuzunguka katika maisha yetu. Kama ujuavyo mti, huwa kuna majani, matawi na mizizi. Vivyo hivyo watu wanaotuzunguka, wapo ambao ni majani, wapo ambao ni matawi na pia wapo ambao ni mizizi. Kuna watu  wanakuja katika maisha yetu kama majani kwenye  mti. Huwa wapo kwa msimu tu, huwezi kuwategemea muda wote, kwa sababu wao ni dhaifu. Ila wapo kwa ajili ya kutoa kivuli. Hivyo si wakuwapuuza. Kama yalivyo majani kwenye mti wapo kwa ajili ya kunyonya chochote kutoka kwako. Nakufanya wapendeze kisha wachanue maua mazuri. Lakini kuna kipindi cha kiangazi kikifika jua huwa, ni kali na upepo makali wao hunyauka na kupeperushwa na upepo huondoka na kukuacha mpweke. Huwezi kuwalaumu kwa kuwa hivyo ndivyo walivyoumbwa.
Aina ya pili wa watu wanaotuzunguka ni kama matawi kwenye  mti wao huhimili vishindo kuliko majani, watakuwa na wewe katika kipindi kirefu katika maisha yako. Ukipata misikitiko mikali mara mbili au tatu ni rahisi kuwapoteza. Mara nyingi hawa huwa na subira. Lakini hali ikiwa ngumu sasa sana hukuacha mpweke, ingawa wana msikamano kuliko majani. Unatakiwa kuwachambua sana kabla hujawekaeza muda wako mwingi kwao. Lakini, usiwalaumu kwa kuwa hivyo ndivyo walivyoumbwa.
Aina ya tatu ni watu wanaokuja kwako kama mizizi kwenye mti ukiwapata hawa shukuru MUNGU ni vigumu kuwaona au kuwapata huwa hawajionyeshi. Kazi yao ni kushikilia usianguke, uweze kufanikiwa na kuishi maisha yenye afya na furaha tele.  Unapofanikiwa hukutakia mafanikio zaidi, hukaa nyuma ya pazia, na hawatoi nafasi kwa walimwengu kugundua kuwa wapo kwa ajili yako. Ukipata mitikisiko mikali katika maisha yako huvumilia na kuishi na wewe hadi mwisho. Chochote kikikutokea kiwe kibaya au kizuri wao wapo. Kama ulivyo mti una majanai mengi, matawi mengi, lakini mizizi michache sana na ni vigumu kuiona.
Tuangalie maisha yetu kuna matawi na majani mangapi yanayotuzunguka, Na je? kuna mizizi mingapi?  Na swali la mwisho ambalo pia ni muhimu je? wewe ni nani kwa watu wanaokuzunguka?

Monday, March 20, 2017

JUMATATU YA LEO TUENDELEE NA TAMADUNI ZETU ZA ASILI:- HAPA TUNAONA GHALA ZETU ZA ASILI

Hii ni ghala ambalo lilitumika kuhifadhi chakula/nafaka na mpaka leo ghala kama hii bado hutumika katika jamii zetu.

Friday, March 17, 2017

TUDUMISHE UTAMADUNI WETU

 NI NGOMA YA ASILI YA KINGONI KWA JINA LA LIZOMBE(KITOTO)
NA HII PIA NI NGOMA YA SILI YA KINGONI KWA JINA LA LIGIU

Thursday, March 16, 2017

MAKAMU WA RAIS JAMUHURI YA MUUNGANO WA TANZANIA MHE. SAMIA SULUHU HASSAN AMEWASILI MJINI MBABENE-SWAZILAND

KITAMADUNI HASWAAA
Makamu wa Rais wa Jamuhuri ya Muungano wa Tanzania Mh. Samia Suluhu Hassan amewasili mjini Mbabene-Swaziland kuhudhuria mkutano wa Wakuu wa nchi na Serikali wa Jumuiya ya Maendeleo Kusini mwa Afrika-SADC. Katika mkutano huu Makamu wa Rais Mhe. Samia Suluhu Hassan anamuwakilisha Rais wa Jamuhuri ya Muungano wa Tanzania Dakta John Magufuli Katika mkutano huo.
CHANZO: Na Emanuel Amas wa Tasnia ya Habari.

Wednesday, March 15, 2017

MCHEZO WA BAO ENZI HIZO AMBAO LILITUMIKA NA MACHIFU

Hii ni bao ambalo lilitumika na MACHIFU kushindana, kwa mfano wao walikuwa hawapigi kura wakati wanachagua kiongozi wa eneo lao. Ila machifu hao walitumia bao kushindania  madaraka na aliyemfunga mwenzake kete nyingi ndiye aliyetawazwa kuwa CHIFU wa eneo fulani.

Tuesday, March 14, 2017

MAISHA:- BAADA YA KUISHI MIKA 60 SASA WAFUNGA NDOA

Mzee wa miaka 98 aoa bibi  wa miaka 88 baada ya kuishi pamoja muda wa miaka 60 huku wakichunguzana.
WAZO: NIMEPENDA UAMUZI WAO.