JUMAPILI YA LEO NAPENDA KUSALI SALA HII KWA WAGONJWA

Na tuwaombee wagonjwa
EWE Baba Mwenyezi, Mpaji wa maisha na afya, twakuomba uwaangalie kwa rehema wagonjwa wote, hasa wao wanaotakiwa maombi yetu, ili kwa baraka yako juu yao, na juu ya wao wawatumikiao, ikiwa mapenzi yako warudishiwe afya yao ya -mwili na ya roho, nao wakutolee shukrani katika kanisa lako takatifu; kwa Yesu Kristo, Bwana wetu. Amina.

Hongera wajina wangu kwa siku ya kuzaliwa:- Yasinta

Leo napenda kuwapongeza shangazi zangu kwa siku zao za kuzaliwa. Lakini hasa kwa siku hii ya leo napenda kumpongeza wajina wangu Yasinta kwa kutimiza miaka 6. HONGERA sana kwa siku yako wajina na uwe na wakati mzuri na Mungu akulinde ukue na uwe msichana mwema na pia uwe na afya njema.

Sheria/Utaratibu/Maoni tofauti

Kuna mambo mengine huku ughaibuni ukiyafananisha na huko nyumbani unabaki na maswali chungu mzima, kuna wakati niliwahi kuzungumzia juu ya taratibu za mazishi hapa Sweden.

Lakini hebu leo tuangalie upande wa mambo ya starehe hususan pombe na sigara.
Tuanze na ununuzi wa pombe, ununuzi wa pombe hapa ni tofauti sana na nyumbani TZ. Hapa huruhusiwi kununua pombe kama hujatimiza miaka 20 na ni lazima uonyeshe kitambulisho.

Haya yalinipata mie siku moja nilikuwa kwenye duka la pombe nilikuwa nataka ninunue pombe. Kilichotokea ni kwamba nilikataliwa na hata nilipowaonyesha kitambulisho changu walibisha . Nilitoka bila pombe, toka siku hiyo sipendi kabisa kwenda kwenye duka lile la pombe. Yaani hawakuniamini kabisa miaka yangu.
Sio kama TZ unamtuma mtoto wa miaka 5 kununua pombe bila wasiwasi kabisa

Sheria hii vivyo hivyo kwenye kununua sigara ni lazima uwe na miaka 20 au zaidi. Lakini cha ajabu utakuta watoto wa shule za msingi wanavuta sigara. Na utajiuliza wamepata wapi ? Ndiyo! Magendo yapo Ulimwenguni kote wanawatuma kaka zao,dada zao, au hata wazazi wao wawasaidie kuwatafutia vitu kama hivyo

Kwa hiyo hapa ukiwa na umbo dogo ni vigumu kupata huduma ya pombe au sigara hata kama una miaka 40. Sweden ni nchi yenye sheria kali kidogo sio nawatisha hapana. Hapa kila mtu ana namba ya utambulisho (person number) na ni lazima uijue kwani karibu kila sehemu unatakiwa kuitaja hiyo namba.

Hata hivyo pamoja na masharti hayo pamoja na sheria zao kali msije mkadhani kuwa kuna nidhamu ya hali ya juu kwa watoto, hiyo ni kujidanganya, kwani kuna ukosefu wa nidhamu miongoni mwa watoto na vitu kama pombe, sigara na madawa ya kulevywa yanatumiwa sana na watoto na hivyo nidhamu kushuka kwa kiasi fulani.

Wapo watoto wenye nidhamu, lakini kuna wale ambao kutokana na aidha malezi au wazazi kutalikiana na hivyo kujikuta wakiwa hawapati malezi yanayostahili, wengi wametumbukia kwenye matumizi ya pombe na sigara na hata madawa ya kulevya wakitafuta faraja.

Sina uhakika na huko nyumbani juu ya sheria hii kama inatekelezwa na kama inatekelezwa , je ni kwa kiasi gani? Lipo tatizo moja ambalo niliona hapo nyumbani Tanzania, kuna mlolongo wa visheria vidogovidogo ambavyo vinatungwa kwa staili ya kuzima moto hasa pale linapotokea tatizo, lakini baada ya muda mfupi tu, husahaulika na watu wanaendelea kuvunja hiyo sheria kama kawaida. ”Sidhani nitakosea kusema kuwa inawezekana sheria ipo, lakini je ni kweli na inafanya kazi?”

LEO NAPENDA KUTOA SHUKRANI KWA WASOMAJI NA WATOA MAONI PIA USHAURI WENU KATIKA BLOG HII....

Kwa ajili yenu

Ni furaha kubwa kuweza kuchukua nafasi hii, na kushukuru jambo lolote zuri/jema na pia kuzikubali changamoto zinazotolewa. Leo ningependa kuwashukuruni wote kwa maoni yenu mazuri. Kwa kutembelea blog hii , kweli nasema upendo wenu na mshikamano ni mafanikio makubwa kwa mimi na pia kwenu. Kwani kama wote tujuavyo blog bila maoni hatuwezi kujua mafanikio na mapungufu yake. Kwa hiyo kwa jambo hili napenda KUWASHUKURUNI WOTE, NA NASEMA PAMOJA DAIMA bila kusahahu UPENDO DAIMA!!!!!

NCHI YANGU TANZANIA

Nimeusikiliza wimbo huu sijui mara ngapi na mwisho nimeona afadhali tu niuweke hapa ili nikifungua tu blog niwe naisukia!!!! Karibuni nanyi muusikilize.

Made in Tanzania:- Je? Vitokavyo nje ni bora zaidi?

Nawaza ni mwaka 2011 na nipo pale Ikulu, Rais Rev. Kishoka, natafakari cha kufanya ili kusisimua uzalishaji wa ndani na naita mkutano na Wafanyabiashara kupitia TCCIA, Wizara ya Biashara, Chama cha Wakulima TFA, Wizara ya kilimo, uvuvi na mifugo na watu wa TBS, Chakula Bora na Waziri Mkuu.

Tukiwa tunakunywa maji ya matunda ya Maaza na kufinyanga vipande vya nyama vilivyonunuliwa shoprite na mkusanyiko huo kuhudumiwa na Movenpick, nawauliza wote walioko,

"je ni lini nitaweza kutumia kila kitu pale Ikulu na hata kununua madukani bidhaa zinazosema "made in Tanzania"?

Wakiwa bado wanatafakari, nitawarushia kombora jipya na kutoa amri ya upole kuwa ikifika mwaka 2013, nataka nione kuwa kila kona kuna bidhaa zilizotengenezwa Tanzania na kuzalishwa Tanzania! Zaidi natoa amri kwa mtu wa Ikulu, Luhanjo wangu kuwa kuanzia siku hiyo, ni marufuku kwa Ikulu kutumia bidhaa kutoka nje, ikiwa bidhaa hizo zinazalishwa Tanzania na tunauwezo wa kuzitengeneza (manufacture) zitumike.

Nitawageukia Wafanyabiashara, Wakulima na Mawaziri wa wizara husika na kuwauliza, wanahitaji nini kutoka kwangu na Serikali yangu ili mkate, siagi, maziwa, matunda, asali, chai, soda, bia, mvinyo, mayai, nyama, mchele, mahindi na aina yeyote ya Chakula kinachopikwa na kutumika Ikulu ni mali ya Tanzania kutoka kwa Mkulima wa Kitanzania na kusindikwa kwa ubora wa kimataifa na kampuni ya Kitanzania?

Nitaendelea na kuwauliza Wafanyabiashara wenye viwanda, ni lini Ikulu itaanza kutumia karatasi zinazozalishwa Tanzania kwa kutumia miti ya Tanzania? ni lini penseli, kalamu na samani za ofisini na nyumba za Ikulu zitakuwa zote ni mali ya Tanzania kuanzia malighafi mpaka zao la mwisho?

Je itakuwa ni makosa kutoa amri na agizo kama hilo na kuwataka wanieleze wanataka nini kutoka kwangu ili mimi kama Rais wa Tanzania na Raia wa Tanzania waanze kujivunia matunda ya mazao yetu na si kufikiria mara mbili mbili tukienda Shoprite ambako asilimia 97% ya bidhaa ni kutoka nje ya nchi?

Hivi kutakuwa na ubaya gani ikiwa VOIL na Tanbond ikawa ndio chaguo la Mtanzania badala ya Blue Band na Korie?

Je ni dhambi kuona kuwa nyama na vyakula vinazalishwa Tanzania kwa ubora kama ule wa zile nyama za Farmers Choice kutoka kenya au zile nyama za Afrika Kusini?

Je ni dhambi kuona kuwa tunaanza kutengeneza samani nzuri kwa kutumia mafundi wetu na viwanda vyetu badala ya kuagiza kutoka Dubai?

Je nitakuwa nimekosea kutoa hamasisho kama hilo kwa Wafanyabiashara ili kuzindua upya shughuli za Uzalishaji mali wa nchi yetu kitu ambacho kitatoa ubora wa bidhaa zetu na zaidi kutoa ajira kwa Watanzania na kuachana na uagizaji wa bidhaa na vyakula ambavyo tuna uwezo mkubwa wa kuzalisha wenyewe na hivyo tuache kuomba mikopo au kutumia fedha zetu za kigeni kununulia vitu ambavyo tunavyo hapa hapa nchini?

Mada hii iliyoandikwa na Rev. Kishoka kwenye Jamiiforum nimeipenda na nikaona ni vema niiweke hapa ili wengi tuione na kusoma.

NYIMBO ZA MCHAKAMCHAKA/KUMBUKUMBU

Leo nimekumbuka wakati nasoma shule hasa shule ya msingi saa kumi na moja alfajiri kuwahi shule kisa nini? Kuwahi namba na kukimbia mchakamchaka huku mnatweta kama nini na mkiimba nyimbo:- Kwa mfano:-
1. Panda mlima panda, panda, panda, pasnda usichoke........x2
2. Iddi amin akifa mimi siwezi kulia nitamtupa kagera awe chakula cha mamba.x2
3.Jua lille literemke mama, mwezi nao uteremke mama haiyahiyaaa hiyaa hiyaa mamaaaa.....x2
4. Alisema, alisema, alisemaaa Nyerere alisema vijana wangu wote mwalegea shart tuanze mchakamchakax2.....

Kama kun mtu anakumbuka wimbo mwingine basi karibu kuongezea hapa.

JE? UNANIKARIBISHA NYUMBANI MWAKO!!!!!!! PIA LEO NI JUMAPILI/DOMINIKA YA KWANZA YA MAJILIO YA MWAKA C

Naondoka nyumbani kwa Yasinta sasa na nimeacha baraka, je? unanikaribisha kwako? Nipokee kwa upendo na unitume kwa wengine/nyumba nyingine ili niweze kuwabariki wao pia. Uwe na siku yenye baraka. Nipo mlangoni, nabisha hodi. Kama kuna mtu ananisikia na afungue mlango. Nitaingia ndani na kula nao/nanyi katika meza yenu/yao. Sasa anaenda nyumbani kwako mwache yeye akubariki na umwonyeshe nyumbanyingine. MUNGU NI MKUBWA!!!!!!!JUMAPILI NJEMA KWA WOTE!!!

TAFAKARI YA LEO KWENU AU KWA PAMOJA!!!!

Wanaume wawili wamekaa na wanavua samaki.Na huku wakiwa na filosofia jinsi wanaume wanywavyo bia/pombe. Baada ya kukaa kwa masaa kadhaa John anamwambia Thomas:

"Mimi nadhani nataka kumwacha mke wangu. Mke wangu hajaongea nami kwa muda wa miezi miwili sasa"

Thomas amekaa kimya kwa muda huku akinywa bia yake kabla hajamjibu john:- Na baadaye akamjibu:- "Mimi ninakushauri jaribu kufikiri kwa makini zaidi. Wanawake wa aina hii ni ngumu sana kuwapata.!!!!!!!

NAPENDA KUMPONGEZA MDOGO WANGU PEKEE, KWA KUTIMIZA MIAKA LEO... HONGERA SANA MDOGO WANGU!!

Ni mdogo wangu wa mwisho.

Leo ni siku maalum na ya pekee kwa mdogo wangu. Ilikuwa si muda mrefu nilikubeba na ukanikojolea mkojo mgongoni. Kweli sasa naamini miaka inazidi kwenda tena inakimbia kwa haraka sana. Sisi wote hapa nyumbani tunapenda kukupa HONGERA sana kwa kutimiza miaka. Na tunakuombea uwe na maisha mazuri, pia nakuombea kwa sala hii, Mungu akubariki, akuongoze, akufariji na akusaidie katika mambo yako. HONGERA SANA MDOGO WANGU MPENDWA KWA KUTIMIZA MIAKA . HONGERA MAMA MDOGO, SHEMEJI , RAFIKI NK. NAAMINI UNA WAKATI MZURI!!!!!

Hata miguu nayo hupendezeshwa!!!! Swali je ni vibaya?

Vikuku ni urembo au?

KUNA mtu kanitumia hiyo picha anauliza hizo shanga za miguuni zinavaliwa kujiremba au zina maana nyingine?
Kwa mujibu wa maelezo yake, amewahi kusikia kwamba, shanga hizo a.k.a vikuku zina maana yake hivyo anaomba kufahamu kama ni kweli.
Anasema, kaelezwa kwamba, kikuku kikivaliwa mguu wa kulia ina maana yake, na kikivaliwa kushoto kinakuwa na maana nyingine, ni kweli?
Kama kila mguu una maana yake, vikivaliwa miguu yote inamaanisha nini?

HONGERA KWA SIKU YAKO YA KUZALIWA DADA MARIAM!!!

Nina hakika siku yako ya kuzaliwa ulikuwa na muda mzuri na pia ulipata chakula kizuri. Mwenyezi Mungu akujalie maisha marefu hadi uwaone wajukuu wangu. HONGERA SANA DADA KWA SIKU HII MUHIMU KUONGEZA KAMWAKA AU SIJUI GUMWAKA:-)

ZILIKUWA NI SIKU KUMI ZA KUSIKITISHA KWA MWENETU!!!!

Kwako dada Yasinta, mimi ni msomaji wa blog yako kwa muda mrefu sasa.Kwa kuwa Blog yako inahusiana na mambo ya maisha kwa ujumla nami nina mkasa ambao nimeona nikutumie ili wasomaji wa blog hii nao wajue madhila niliyoyapata mimi na familia yangu.

Katika juhudi zetu za kutafuta mkwanja (Fedha) mimi na mume wangu tukakubaliana tutafute house girl ili atusaidia kukaa na mtoto wetu ikiwa ni pamoja na kufanya shughuli nyingine za usafi kwa ujumla pale nyumbani.

Baada ya kuhangaika sana, maana siku hizi ma house girl wamekuwa adimu sana hapa jijini Dar es salaam, kutokana na juhudi za serikali yetu kuhakikisha kuwa kila mtoto anapata elimu.Tofauti na zamani ambapo ilikuwa kila mwisho wa mwaka watoto hasa wa kike wanaomaliza darasa la saba wanaletwa mjini kutafutiwa kazi za ndani, siku hizi mambo ni tofauti sana, kila mzazi anajua umuhimu wa elimu na kwa kuwa inapatikana kwa urahisi, japo haijakuwa ya kiwango kinachoridhisha, kutokana na serikali kujenga shule nyingi za kata lakini zikiwa haziendi sambamba na kuongeza walimu wa kutosha katika shule hizo, idadi ya watoto wanaoletwa mjini kufanya kazi za ndani imezidi kupungua siku hadi siku.

Hata hivyo, juhudi zetu zilizaa matunda, tulimpata binti ambaye na yeye pia anaye mtoto wa kike makamo ya mwenetu Brian, aliyezalishwa na kutelekezwa huko kijijini kwao Handeni Tanga, alikuja huku mjini kuishi na dada yake binamu lakini inaonekana hakupokelewa vizuri, hivyo ikamlazimu atafute kazi, ambapo aliletwa kwetu.

Alituomba tumpatie nauli ili amrudishe mwanae nyumbani akakae na mama yake ili aweze kufanya kazi kwa ufanisi, tuliafiki, lakini baadae tukaona ni vyema akiishi na sisi pamoja na mwanae kwa kuwa mwenetu alishaanza kuzoeana na hako ka binti ikabidi turidhie abaki na mwanae kama vile kampani kwa mwenetu.

Tulimwambia wazi kuwa pamoja na kumlipa mshahara lakini ataishi na sisi kama ndugu kwa maana akiwa na shida yoyote ile aseme tutamsaidia nje ya mshahara. Alionekana kuwa mpole sana na mwenye nidhamu na wote tulimpenda sana.

Tulikuwa tunampenda yeye na mwanae na tulikuwa tunamuhudumia mwanae sawa na mwenetu, bila ya ubaguzi na tuliamua kumpa pesa akafanye shopping ya nguo zake na mwanae. Lakini kukawa na hali ya uchafu pale nyumbani, na watoto wakawa hawaogeshwi na kama ni kuogeshwa inakuwa ni kuwaloweka tu kwenye maji na hata nguo nazo zikifuliwa hazitakati. Tulijadiliana na mume wangu tukaona labda ni kutokana na kutingwa na kulea watoto, kwani watoto wote walikuwa ni watundu, mwenetu ni mtundu na mwanae pia ni mtundu.

Tuliona ni vyema amrudishe mwanae huko kwao Handeni ili asiwe na majukumu mengi.Tuliandaa nauli na kumweleza kuwa siku mbili zijazo atasafiri kwenda kwao kumpeleka mtoto.
Aliaga kumpeleka mtoto wake akasukwe huko kwa dada yake na tulimruhusu, lakini hapo ndipo tulipokuja kugundua mengi tusiyoyajua.

Hakurudi siku ile na siku iliyofuata tuliamua kufanya usafi wenyewe, dada Yasinta, tulikutana na vitu vya ajabu chini ya kitanda, ambao haufai kuelezea humu. Tulikuta vidonge vya majira pamoja makorokoro mengine ambayo yalikuwa yanatia kinyaa.

Tulishikwa na kinyaa, lakini ni nyumba yetu tutaacha huo uchafu? Ikabidi tusafishe chumba mpaka kikawa kusafi pamoja na kufua nguo zote pale nyumbani ikiwa ni pamoja na za kwake na za mtoto wake.

Tulipozungumza na jirani yetu mmoja ili kujua hali halisi ya pale nyumbani maana sisi wote ni wajasiriamali na hatushindi nyumbani. Kwa kusita sita sana ndio akatueleza. Kumbe kila tukiondoka nyumbani yule binti na yeye anatoka zake kwenda kwa mabwana zake na kurudi mchana lakini anakuwa kambebea mwanae chipsi, na mwenetu Brian anashinda na njaa kwa kuwa hawezi kula chipsi kavu, inatokea watoto wa jirani yetu humpa chakula na kila akiulizwa anasema kuwa eti hatujaacha pesa za matumizi, wakati tulikuwa tunampa pesa za kutosha.

Alikuwa kila siku ananunua nguo mpya na pesa zetu, na kibaya zaidi ilikuwa Brian akilia njaa anamtukama matusi makubwa kama mtu mzima….eti anamwambia ku*****la mama yako msenge wewe sasa unalia nini…….kamlilie mama yako huko…..Hivi hayo matusi anastahili mtoto kama Brian ambaye ndio atatimiza miaka miwili mwezi ujao?

Tulisimuliwa vituko vyake vingi sana mpaka nililia kwa uchungu. Ilipofika usiku ndio akarudi, mume wangu hakuwa na maneno mengi alimlipa mshahara wake wa siku kumi alizoishi na sisi na akamwamuru arudi alipotoka usiku ule ule. Aliacha nguo zake mpaka leo hajaja kuzichukua, lakini kuna siku alikuja mahali ninapofanyia biashara zangu kunisalimia na kuniomba radhi. Alikiri kufanya hayo niliyosimuliwa na aliomba tumpe nafasi nyingine, ila mume wangu amekataa katakata kumpokea tena. Ila nilipomchunguza alionekana kuwa na hali mbaya sana na alinilalamikia kuwa hajala huko kwa dada yake, na hata mtoto wake naye anaonekana afya yake imedorora sana kutokana na kutopata chakula.

Nilishikwa na huruma na nilimpa fedha kidogo ili akamnunulie mtoto chakula.Hivi sasa anatangatanga mtaani na nadhani ashaanza kufanya umalaya kwani kuna siku nilikutana naye majira ya usiku nikitoka kwenye biashara zangu, hizo nguo alizovaa, zinatia aibu, yaani dada Yasinta alikuwa amevaa kinguo kifupii na kiblauzi kilichoacha mgongo na sehemu ya kitovu nje, nilimsimamisha na kumuuliza anakoelekea usiku ule, kwa aibu sana aliniambia kuwa anakwenda kwa rafiki yake.Sikusema kitu nilimuacha aendelee na safari zake na mimi nikajirudia zangu nyumbani kwangu, yaani dada, niliogopa, kumbe nilikuwa naishi na fuska ndani ya nyumba bila kujua. Kusema kweli dada nilibaki na maswali mengi sana ambayo sikuweza kupata majibu yake.

Hivi mtu kama huyo anaweza kusingizia kuwa anafanya umalaya kwa kuwa hana fedha au ni kutafuta fedha kwa njia ya mkato? Je hakuna shughuli yoyote ambayo angeweza kufanya zaidi ya umalaya? Je akipata ukimwi, ni nini hatima ya mwanaye?

Sasa sijui tulifanya ukatili kumfukuza au alistahili……..naomba ushauri wako……..

AHSANTE MUNGU WANGU!!!!!

Dear GOD:
I want to thank You for what you have already done.
I am not going to wait until I see results or receive rewards.
I am not going to wait until I feel better or things look better.
I'm not going to wait until people say they are sorry or until they stop talking about me.
I am not going to wait until the pain in my body disappears.
I am not going to wait until my financial situation improves.
I am not going to wait until the children are asleep and the house is quiet.
I am not going to wait until I get promoted at work or until I get the job.
I am not going to wait until I understand every experience in my life that has caused me pain or grief.
I am not going to wait until the journey gets easier or the challenges are removed.
I am thanking you right now. I am thanking you because I am alive. I am thanking you because I made it through the days of difficulties. I am thanking you because I have walked around the obstacles.
I am thanking you because I have the ability and the opportunity to do more and do better.

I'm thanking you because FATHER, YOU haven't given up on me.
Have a great day, and an even better tomorrow.

Hii nilitumiwa na rafiki mwema nimeipenda na nimeona si mbaya kama nikiweka hapa kibarazani ili tuombe kwa pamoja. Amina. JUMAPILI NJEMA KWA WOTE !!!!!!!!!!

SIJUI HUYU DADA NI NANI KAMA NAMFAHAMU VILE?

Hakika kuna sehemu nimemwona lakini sikumbuki ni wapi tena nimewahi kula naye ugali na matembele. Labada wenzangu mtanisaidia.

+RAFIKI YANGU MPENDWA AGNESTA MAPUNDA+

Kutokana na sheria au sijui niseme mipango ya Tanzania kuwahamisha/shwa walimu:- Nakumbuka ilikuwa mwaka 1985 baba alipata uhamisho kutoka Lundo s/m kwenda kijiji kimoja chenye shule iitwayo Kingoli. Nilikuwa darasa la tano. Nilipofika pale shuleni nilikutana na wanafunzi wengi, lakini Agnesta alinipokea kwa namna yake.
Tulianza urafiki wetu, uarafiki ambao tulikuwa wakati wa jumamosi au jumapili tukitembeleana majumbani. Yaani, tulikuwa tukitembeleana, huku tunachuklua zawadi(ndundu) unga kwenye jamanda na kuku. Na ukifika kwake unachinjiwa kuku pia.

Nliachana mwaka 1988 na rafiki yangu Agnesta. Mwaka 2007 nilikuwa nyumbani TZ. Siku moja nilikuwa mjini – Songea, katika pitapita ghafla mtu akanishika bega na kunisalimia dada Yasinta shikamoo! Nikashtuka na kugeuka alikuwa mdogo wake Agnesta. Nikasema moyoni AHSANTE Mungu. Kwa kufurahi kupata habari za rafiki yangu Agnesta. . Lakini habari nilizozipata hazikuwa nzuri Agnesta rafiki yangu alikuwa hayupo tena nami alishafariki muda mrefu labda miaka mitatu iliyopita. Sikuamini masikio yangu, nilisikitika sana , kwani alikuwa rafiki yangu mpendwa. Na leo naona amenishukia nkwani nimemkumbuka sana ndio maana kisa cha kuandika hapa. Mwenyezi Mungu Aiweke Roho yako PEPONI AMINA..

NGOJA LEO TUMSIKILIZE MTAKATIFU SIMON KITURURU NA WIMBO WAKE NAMPENDA

Sikujua kama kaka Simon ni mtungaji pia wa nyimbo. Siku njema kwa wote na wimbo huu au ngoja tumsikilize na huu wimbo akiwa akimsifia Hukwe Zawose karibuni:-

Mapenzi bila Mawasiliano ni kujidanganya

Inatosha mwanamume kumpa mkewe fedha na kila kitu bila kuzungumza naye na kusikiliza hisia zake? Inatosha mwananke kumpa mapenzi ya kila aina mumewe wawapo chumbani bila kusema hisia zake kwake na kuwa tayari kufunga njia za kujadili mambo yanayowahusu? Hebu soma mfano huo hapo chini kwani kuna uvumbuzi wa ni kwa nini tunaweza kuwa na kila kitu kimapato au kisura na kimaumbile, lakini wapenzi wetu wakatuacha.
Johnson amerudi nyumbani kutoka kwenya shughuli zake na kama kawaida yake, salaam yake ya kwanza kwa mkewe ni kuuliza, “Mbona viatu vimewekwa njiani.” Pengine siyo salaam tu, bali hilo litabaki kuwa tamshi au kauli pekee kwa muda mrefu ujao wa jioni ile. Baada ya hapo Johnson huingia chumbani ambako hukaa sana hadi chakula kinapoiva. Mkewe anajaribu kumuuliza jinsi kazi ilivyokuwa kwa siku ile. Johnson, baada ya kujivuta sana anajibu kwa kifupi, “safi tu”.

Mkewe anajaribu tena kutafuta njia ya kuwasiliana na mumewe. Anajaribu kumsimulia jinsi gari moja la mchanga lilivyotaka kumuuwa utingo wake hapo mtaani mchana ule. Johnson anasikiliza habari hiyo bila kuonyesha hali yoyote ya mabadiliko na wala hajibu wala angalau kusema,. “Hawa utingo nao wana hatari.” Haoni, hana sababu ya kujibu. Lakini bado anaamini na anadai kwamba huyo ni mkewe, tena wakati mwingine akisema ni mkewe mpendwa. Wengi wetu ni kama Johnson au tuna wanaume kama yeye.
Tunaweza kuwa na kila kitu kwa upande wetu. Mali, umaarufu mkubwa, kazi nzuri, watoto wazuri na vingine, lakini tukakosa hisia kwa wapenzi wetu. Tukakosa kuwa na uwezo wa kubaini haja ya kujali kuhusu hisia za tuwapendao au tunaodai kuwa tunawapenda. Kukosa uwezo wa kubaini hisia ni kushindwa kwetu kufungua njia na mawasiliano kwa wenzetu hao.
Mawasiliano katika ndoa ni nini? Inaweza ikaonekana kama vile swali hili ni rahisi kupatiwa jibu, lakini kwa kweli ni wanandoa wachache sana wanaoweza kutoa jibu sahihi la swali hili. Mawasiliano kwa wengi ni kuzungumza au kijibizana. Huenda hiyo ni kweli, lakini hata wanaogombana huzungumza na kujibizana pia. Mawasilino katika uhusiano kwa kifupi, lakini kwa ufasaha, yana maana ya wanandoa kuzungumza kila mmoja kwa uhuru na kwa uadilifu. Wanandoa au watu wengine wowote wanapowasiliana vizuri, huzungumza juu ya matatizo yao, furaha, huzuni na kile kinachoenda kwenye akili au mawazo ya kila mmoja-huzungumza hisia zao.
Huwa tunasema na kushauri kuhusu mawasiliano mazuri ndani ya ndoa. Huwa tunasisitiza sana kuhusu wapenzi kuwa makini wanapojaribu kusema au kuwasilisha hisia zao kwa wenzao. Lakini huenda ugumu uko kwenye kufahamu maana ya mawasiliano ndani ya ndoa, achilia mali mawasiliano mazuri.
Lakini bila shaka kutokana na fasili hiyo fupi, tunaweza kuwa na picha angalau ndogo kuhusu maana ya mawasiliano katika ndoa. Mawasiliano mazuri ina maana vitendo fulani ambavyo vikifanyika katika utaratibu fulani, ndoa kukomaa na kushika mizizi kwa kiwango cha juu sana cha uimara, na ambayo yasipofanyika, uwezekano ni kwa ndoa husika kuanguka.
Pengine mtu anaweza kuuliza, inakuwaje watu ambao tulikutana tukiwa hatujuani, tukavutiana kwa sababu mbalimbali hadi tukafikia uamuzi kwa furaha kwamba tunaweza kuishi pamoja, leo hii tushindwe kuzungumza kwa uhuru na uadilifu? Kwa nini wanandoa hushindwa kuwasiliana? Kuna sababu nyingi, lakini inayokusanya zote ni moja-wengi hatujui umuhimu wa mawasiliano na pengine hatuoni kuwasiliana kama sehemu muhimu kwenye maisha yetu ya kindoa.
Kuna wakati tunadhani kimakosa, kwamba kuwasiliana kunaweza kutuharibia uhusiano wetu badala ya kujenga. Kwa hiyo, tunaamua kuzifutika hisia zetu, mawazo yetu na ushauri wetu vifuani mwetu. Mtu amepatikana na tatizo, anadhani akimwambia mwenzake atamvunja nguvu, atamtisha au atamfanya amlaumu au kumuona hana maana. Hivyo, anaamua kunyamaza. Inapokuja kufahamika, mwenzake hudhani alimficha kwa kutomjali, kutomwamini au kutompenda. Badala ya kutatua tatizo, hali hiyo inakuwa imezua tatizo jipya.
Lakini kuna ukweli ambao sisi kama binadamu, kila mmoja wetu ni lazima aukubali. Ukweli huu ni ule kwamba, ndani kabisa ya mioyo yetu huwa tunatamani kuzungumzia hisia zetu. Tungependa sana bila shaka kuonyesha undani wetu, yaani hisia zetu kwa wengine. Siyo jambo la nasibu tu kwamba wengi wetu tunajikuta tunataka au tuna rafiki wa karibu angalau mmoja kwenye maisha yetu. Hii ni kwa sababu tunataka mahali pa kuonyesha nafsi zetu halisi, yaani kusema tunavyohisi. Tungependa kuwa atatudharau au kutuona tuna mapungufu. Badala yake atashiriki nasi katika hisia hizo, ziwe mbaya au nzuri, za kutisha au kufurahisha na za aibu au za sifa.
Lakini siyo kwa sababu ya sisi kusikilizwa na kueleweka u , lakini pia tungependa kuwasikiliza wale ambao nao wanatusikiliza. Kusikia hisia zao za ndani na ukweli unaoenda kwenye mawazo au hisia zao. Ukiangalia sana kutokana na ukweli huo, utaona kwamba, moja ya sababu ya kuoa au kuolewa ni kuwasiliana. Sasa kama hadhi ya chini sana, ni kama vile hiyo ndoa haipo kabisa. Bila mawasiliano, ndoa inakuwa ni sawa na muungano wa watu wawili wanaoishi chini ya paa siyo watu wawili wanopendana.
Hebu tujiulize. Unawezaje kusema au kupima kwamba ndoa fulani haina mawasiliano? Suala hili linaonekana kama vile liko wazi sana, lakini kamwe siyo hivyo. Watu wengi kwenye ndoa wanakabiliwa na migogoro na kutoelewana kwingi, lakini kamwe hakuna ajuaye kati yao kwamba tatizo ni kukosa mawasiliano. Kukosa mawasilino kunaweza kuzaa hali ambayo ndiyo inayoonekana kuwa ndicho chanzo cha tatizo ndani ya ndoa, kukosa mawasiliano kwenyewe kukiwa kumejificha au kukiwa wazi, lakini kwa sababu hatujali kuwepo au kutokuwepo kwake tukashindwa kuona.
Wakati mwingine ni kweli kwamba tatizo lililopo siyo kukosa mawasiliano, lakini kwa sababu hakuna mawasiliano, tatizo hilo huwa kubwa na pengine kuzaa matatizo mengine ambayo hatimaye huwa magumu kusuluhishwa. Matatizo ambayo yangesuluhishwa hufikia mahali yakaiangusha ndoa sababu yamekosa kusemwa na kutafutiwa ufumbuzi. Yatasemwa wapi na saa ngapi, wakati hakuna mawasiliano.

Makala hii nimeichukua kutoka kwenye kitabu cha Maisha na Mafanikio kilichoandikwa na Hayati Munga Tehenan ambaye alikuwa ni Mwalimu mzuri wa maarifa ya Utambuzi akitoa elimu hiyo kupitia magazeti yake ya Jitambue, vitabu na semina zake nchini Tanzania kabla ya kufariki dunia.

NI JUMAPILI/DOMINIKA YA 33 YA MWAKA B

Sala ya baba yetu
Basi nanyi salini hivi:-

KISWAHILI
Baba yetu uliye Mbinguni,
Jina lako litukuzwe,
Ufalme wako uje,
Mapenzi yako yatimizwe,hapa duniani kama huko Mbinguni.
Utupe leo riziki yetu,
Utusemehe deni zetu, kama sisi nasi tuwasamehevyo wadeni wetu.
Na usitutie majaribuni, lakini utuokoe na yule mwovu.
(Kwa kuwa ufalme ni wako, na nguvu, na utukufu, hata milele Amina)

Mt. 6, 9-13

DADI WITU

Hinu nyenye pemwisali, msala naha:-
CHINGINI/KINGONI
Dadi witu,
Witama kunani kulihundi,
Lihina laku lihyuwanike,
Ubambu waku utibwerele,
Chewifuna wenga vakiti vandu,
pamlima apa ngati chevikia kunani kulihundi,
Utiletele lelu chakulya chitu cha magono goha,
Utiwusile getihokili,
ngati tete tukuwawonela lipyana vevahoki kwa tete.
Ukotoka kutileka kulemala nichihaki,
nambu utiwusile vihaki.
(Ndava ubambu waveve na makakala na uvaha, magono gaha. Pepayi)
Mt. 6, 9-13.

DOMINIKA YABWINA KWA WOHA/JUMAPILI NJEMA KWA WOTE.!!!!!!!!!!

HONGERA KWA SIKU YA KUZALIWA KAKA FADHY MTANGA!!

Leo ni siku maalumu kwa kaka, rafiki, mdogo, mtoto, ndugu , jamaa bila kusahau mtani Fadhy Mtanga. Katika upekuzi wangu nimegundua ya kwamba leo anatimiza miaka, kwa hiyo napenda kumpongeza kwa siku hii kwa kutimiza miaka. kukutumia ua litasinyaa, kadi itachakaa. Kwa hiyo nakuombea kwa sala hii Mungu akubariki, akuongoze, akufariji na akusaidie katika mambo yako. HONGERA SANA FADHILI MTANGA KWA KUTIMIZA MIAKA . HONGERA MTANI!!!

TUSISAHAU LUGHA ZETU ZA ASILI/KINGONI:- MLYELELU = MLO/MILO

Mwenzenu leo nimetamni kweli kuongea kingoni hii ndio sababu nimeamua kuandika hapa:-

Mlyelelu
Mngoni ilya mara ppadatu kwa kuhwela, Kulawuka, muhi, kulalila. Vandu vangi vilya lukumbi lumonga tu kwa kuhwela. Lukumbi lungi lwa muhi ilya kwa kunonganonga vyakula videbevidebe ngita, liyawu, mbubudu, madonga, matevele, matoki, yembe matangamanga nk.

Kulawuka
Lukela pakuyimuka mungoni ilawuka. Pakulawuka ihopa wuji, lukumbi lungi ihopa wuji na kulyelela vimungulu au manyawu gatelekanu, au gayochanu, ama wuji na chimbwinya cha mayawu galovekanu au ga bundula. Ligono lingi ilawuka chimbala che vakuchipolosa huti. Kadeni vangoni valaukayi kilu, hinu ugali wa kulya kilu vikemela ngunguluku.

Ugali wa muhi

Ugali wa muhi vangi vilya lilanga pamuhana. Vandu vangi vilya he muhi, yitosha chevilawuka lukele. Vanu vangi vilya ugali lukela na kuhamba kumahengu mpaka chimihi nde pevilya ugali wa kulalila.

Ugali wa kulalila

Uwu nde ugali wa kuhambila kugana. Ndava ya mahengu ga muhi, lukumbi lwa kulya ugali wa kulalila nakumanyikana. Vangi vilya kwkona kulizwarara, vangi pakuyingila ngúku kugona, vangi kilu ya chitita.

Vyakulya vya Mngoni

Ugali: Chakulya cha kawaida cha mngoni ni ugali. Uvi ugali wa malombi, ugali wa mayawu gakondowoli au bundura. Uvi ugali wungi wa ulehi na ugali wa mapemba.
Wali: Kuna sambali zamahele za mpunga, ngita lingwindimba, kula na bwana, faya, bungare, sindano nk.
Ugali ama wali vilyelela likolo ngita, nyama, likolo la manyahi, ngowani, ngundi, chipele, mangatungu, chikandi, chimbondi, mawungu, madede, mbeleveta nk.
Ugali vibakulila mchiheneku au mulupalu na likolo vibakulila mu mkere. Vilya ugali kwa mawoko au kwa lukorombi. Vyakula vingi nde ngita mdojolela, mbatata, vingovi, maboga makumbu, nk.

Naona niishia hapa kwa leo mmmmhhh roho yangu imefurahi kuandika hapa ni kama nimeongea na mtu ana kwa ana. Raha jipe mwenyewe mwaya.

POLE KWA MSIBA DA MDOGO KOERO MKUNDI

Nimetoka kazini nimerudi nyumbani, baada ya muda nafungua computer na nasoma ujumbe wenye kicha cha habari NIMEFIWA kutoka kwa da mdogo Koero Mkundi usemao hivi:-

DADA KUNA MAPOROMOKO YA MLIMA YAMETOKEA HUKO UPARENI KIJIJINI KWA MAMA YETU NA KUNA WATU ZAIDI YA 20 WAMEPOTEZA MAISHA MIONGONI MWAO KUNA NDUGU ZAKE MAMA YAANI SHANGAZI YAKE NA WATOTO WAO NA MJOMBA PIA WAMEKUFA, HIVYO KESHO NASAFIRI NA MAMA KWENDA UPARENI KUHANI KWANI WAMEZIKWA LEO HII...... WOTE TUKO HAPA NYUMBANI TUNAOMBOLEZA...........ILA BIBI KOERO NI MZIMA TEGEMEO LANGU. Habari zaidi soma hapa.

JE UPWEKE NI UGONJWA?/ UPWEKE

Wapendwa posti iitwayo JE UPWEKE NI UGONJWA hii niliandika 27/8/2009 naomba kama hukusoma basi ipitie ndo utajua kwa nini nimeweka shairi hili la kaka Fadhy Mtanga.

Upweke

Upweke jama adhabu, upweke unasumbua,
Upweke ni maghilibu, kukufanya kuugua,
Watamani wa karibu, nenolo taelijua,
Upweke.

Upweke hutesa sana, umpendaye awe mbali,
Utamuwazia sana, hata mara alfu mbili,
Kwa usiku na mchana, maumivu ni makali,
Upweke.

Upweke unakondesha, chakula hukitamani,
Upweke unahenyesha, simanzi tele moyoni,
Homa pia hupandisha, na mwokozi humuoni,
Upweke.

Upweke tele mateso, hata machozi kulia,
Moyoni ni manyanyaso, nao moyo kuumia,
Wala si kimasomaso, kwani huleta udhia,
Upweke.

Upweke ni kama jela, huleta nyingi simanzi,
Huwezi hata kulala, maisha tele majonzi,
Utapiga hata sala, uruke vyote viunzi,
Upweke.

Upweke sawa na shimo, mtu ukatumbukia,
Nako shimoni uwamo, wateswa nayo dunia,
Kwani hauna makamo, kuweza kuvumilia,
Upweke.

UJUMBE KUTOKA SWEDEN KWA KAKA LAURENT KINUNDA

Kaka Laurent Kinunda.

Katika ukuaji wangu/akili yangu nilikuwa nafikiri ya kwamba ndugu ni yule mliyezaliwa mama mmoja na baba mmoja. Lakini kumbe nilikuwa na mawazo finyu. Ndugu ni mtu yeyote yule sio TU yule mliozaliwa tumbo moja.

Ilikuwa mwaka 1993 nilipokutana kwa mara ya kwanza na kaka LAURENT KINUNDA. Kaka Laurent, napenda kukushukuru kwa moyo ulio nao, wema wako na upendo wako. Umekuwa karibu sana nasi. Umekuwa huna kinyongo na familia yangu mara kunapotokea shida pia kunapokuwa na raha unakuwa nasi.

Nakumbuka kila tujapo TZ, hakuna mwingine anayekuja kutulaki uwanja wa ndege, isipokuwa ni wewe kaka Kinunda. Kwa hili napenda kutoa shukrani zangu/zetu za dhati. Umekuwa nasi katika matukio mbalimbali na umetusaidia na unatusaidia mambo mengi ambayo siwezi kuyahesabu hapa. Ninachoweza kusema. NAOMBA MWENYEZI MUNGU AKULINDE WEWE NA FAMILIA YAKO MUWE NA AFYA NJEMA NA MAISHA MEMA. TUNAWAPENDA WOTE. UPENDO DAIMA.

TUJIVUNIE LUGHA YETU NZURI KISWAHILI

Dada Sarah Hilwat mtalii wa kibelgiji aliyekipenda kiswahili na maisha ya waswahili baada ya kutembelea Lamu, Kenya kwa masomo. Sasa anakichapa kwelikweli!